December 12 ah an tuahmi UN Credential Committee meeting ah U Kyaw Moe Tun cu Myanmar ram aiawhtu a zungzal UN palai ah kum 1 ṭuanter chap ding in an fehter ṭhan, tiah VOA nih a ṭial.
UN Credential Committee ah US, Russia le Tuluk telh in ram 9 in aiawhtu pawl an i tel hna. Tuluk nih aluancia ni tlawmpal ah khan U Kyaw Moe Tun kong ah duhlonak a langhter nain nizaan meeting ah atu bantuk in an fehter khawh hi a si.
Atu bantuk in U Kyaw Moe Tun nih pehzul in a ṭuan khawh nakhnga Myanmar rammi hna i dirkamahnak le hnatlaknak abiapi tiah U Kyaw Moe Tun pumpak nih tuan deuh ah khan a rak chim bal.
U Kyaw Moe Tun hi NLD cozah nih Myanmar aiawhtu a zungzal UN palai ah rian an khinhmi a rak si. SAC nih ram uknak an chuh hnu in U Kyaw Moe Tun pumpak nih ralkap uknak duhlonak cu UN General Assembly ah kut zung thum thlir in a rak langhter.
Cu caan thawk cun SAC nih U Kyaw Moe Tun cu Myanmar aiawhtu sinak in rian kan chuah tiah an ti nain UN Credential Committee hnatlaknak in nihin ni tiang Myanmar aiawhtu dirhmun ah a um kho.
UN tonpumnak paoh ah U Kyaw Moe Tun nih hin atulio Myanmar ram sining kong cu ramdang cozah lutlai hna sin ah pehzul in a chimphaun zungzal.
