Myanmar ram in India ram lei ah an phorhmi Kuvathei (areca nuts) a phortu motor 6 cu November 10 ah khan Mizoram chung ah mibu pakhat nih mei in an khangh hna, tiah theih a si.
Mizoram chung, Zamuang khuate pawng i National Highway ah minung 50 hrawng a simi mibu nih motor 6 cu an kham hna i a chung thilri vialte le a motor 6 ning in an khangh dih hna.
An khanghmi ah hin Kuvathei bag 122 a um i, motor ngan pakhat le motor fa panga in an phorhmi hna a si. Hi motor 6 hi Mamit District chung Kanhmun khua lei ah a panhmi an si.
Hi thilcang kong he pehtlai hin Kanhmun Police Station ah case cu on a si nain atu tiang ah motor a khangtu minung pakhat hmnah tlaihmi an um rih lo.
“Hlathlainak cu kan thawk cang. Asinain, ahohmanh tlaihmi an um rih lo bang in zei bantuk bu hmanh nih kanmah tuahmi a si tiah an chimmi a um lo,” tiah Mamit district palik awi Lalthangpui Pulamte nih a chim.
Aluancia thla khat hrawng ah khan Mamit District chung ah a ummi Kuvathei a cingmi phu nih phungning loin an phorhmi Kuvathei kong hi ṭuanvo kan lakpiak u, tiah halnak an rak tuah bal.
Cuti halnak an rak tuah hnu thla khat a rauh hnu ah atu bantuk hin Myanmar ram lei in a lutmi Kuvathei pawl mei in khangh an ton dih hi a si.
