Hakha SAC ralhrang nih nihin zinglei sml. 7:00 hrawng thawk in atu tiang bomb pehzul in an kah i Nabual he meng khat le cheu hrawng a hlatnak hmun ah bomb pehzul in an tla, tiah Nabual khua upa pakhat nih a chim.
“Nihin zinglei khan an kah cang. Atu zong a puak lengmang ko. Kan khua Nabual le Khuabe karlak, Nabual he meng khat le cheu hrawng a hlatnak hmun ah bomb an tla. Ram zong a kaang an ti i, atu ah cun kan phelh ngam rih lo,” tiah a cunglei Nabual khua upa nih The Chin Journal ah a chim.
Hakha khuasa pakhat nih, “Zinglei khan Rungtlang in an kah i atu zong hi a puak lengmang ko. Innchung ah kan um hna i khoika lei an kah timi fiang in kan theih lo,” tiah a chim.
Nihin zinglei sml. 6:00 le 7:00 karlak ah Hakhathar lamton (၆လမ်းဆုံ) ah kahdohnak a chuah hnu ah SAC ralhrang nih chunnitlak bomb an kah hi a si.
Hakhathar khuami pakhat nih, “Nihin zinglei sml. 6:00-7:00 karlak ah khan lamton (၆လမ်းဆုံ) ah an i kap. Atutan an i kah cu innlo pawl an khenmi a um lo,” tiah a chim.
Falam lei in a rak rami SAC ralhrang pawl cu nihin zaanlei sml. 5:00 hrwang ah Chuncung khua ah an phan ve, tiah thawng kan theih.
