Nihin January 6 ah a cangmi Pathein thonginn chung meithal kahnak ah ramkhel thongtla pakhat a nunnak a liam i, a dang thongtla 8 zualhma in an um hna, tiah RFA nih a tial.
Nizaan January 5 ah khan Pathein thonginn ah ramkhel thongtla a simi Ko Wei Yan Phyo nih handphone aa ngeihmi cu thongcongtu nih an hmuh tik ah Ko Wei Yan le a hawile pahnih cu khaan dang ah an hren hna i an velh hna.
A thaizing January 6 ah ramkhel thongtla dang pawl nih Ko Wei Yan te thlah ding in halnak an tuah lio ah buaibainak a chuak i, SAC ralhrang le thongcongtu palik pawl nih meithal in thongtla cu an kah hna.
Ko Wei Yan cu a lu ah voi 3 an kah caah a hmun ah a thi colh. A dang thongtla minung 8 zong hi meithal kahnak le an tukvelh hnanak ruang ah zualhma ngaiin an um hna.
Meithal in kah a tongmi Ko Wei Yan hi SAC ralhrang duhlo cawlcanghnak ruang ah kum 28 thongthlak ding in dan an tatmi a si.
