December 7 ah US Lower House nih a rak fehtermi Myanmar ramchung PDF le tlangcungmi hriamtlai hna (EAOs) sin ah bawmhnak pek ding timi upadi cu US Senate (Upper House) zong nih nihin ah a fehter, tiah theih a si.
US Upper House le Lower House nih an fehter cang caah US President Joe Biden nih minsen a thut hnu in cu upadi cu a nung cang lai.
National Defense Authorization Acts (NDAA) timi upadi he aa ruang in US nih kumtin Budget a suai tawn i, atukum ah Myanmar ram Democracy cawlcanghnak rian ah hriamtlaih in a cawlcaangmi PDF le EAOs pawl cu Technology (နည်းပညာ) le ralhriam a si lomi (non-lethal assistance) lei bawmhnak pek ding in US nih timhtuahnak a ngeih hi a si.
Cu pin ah, Myanmar ram democracy cawlcanghnak ah ramleng bawmhnak a um chinchin nakhnga le SAC ralhrang buarmi sualtuahnak pawl a hlathlai i a phozartu zatlangbu hna sin ah bawmhnak pek ding in timhtuah a si ve.
SAC ralhrang duhlo ruang ah CDM a tuahmi ralkap/palik pawl caah bawmhnak program pawl zong an telh chih.
Tu kum US lawmakers pawl nih an hnatlakmi NDAA hi azapi ah cahmai 4,408 a sau. Myanmar ram bawmhnak kong ah ” Tlangcung miphun hriamtlai hna” timi le “PDF” timi min hi cahmai no. 2,307 ah mingfangkheh tein an langhtermi hmuh khawh a si.
Hi Myanmar ram bawmhnak hi 2023 in aa thawk lai i, 2027 tiang kum 8 chung a si lai. April 2022 zong ah khan US cozah nih Burma Acts timi a rak chuah i, cu chung ah cun Myanmar ram sin ah (SAC ralhrang telh lo) kum 8 chung $220.5 million bawmhnak pek ding in hnatlak a rak si.
Atutan NDAA ah ramleng lei bawmhank he pehtlai in Ukraine caah ralhriam lei $800 million bawmhnak pek chap ding in an hna a tla.
Cun, Tuluk tlerhkhawnnak a tongmi Taiwan hi kum 10 chung ah US nih $10 billion bawmhnak pek ding in biachahnak an ngei fawn.
