CDF-Mara ralkap nih an tlaihmi Pu Nei Thlau ningcang loin a hremtu CDF-Mara ralkap (pawl) cu phungning in dantatnak kan pek cang hna, tiah CDF-Mara nih nihin September 15 ah thawngpang an chuah.
Pu Nei Thlau hi Lailenpi khua ah sianginn sayagyi a ttuanmi a si i, SAC he pehtlai in rian a ttuanmi a si, tiah CDF-Mara nih sual an phawt.
“SAC ralkap pawl he pehtlaihnak a ngei zungzalmi a si. An i pehtlaihnak phone number kan hal tik ah ka delete dih cang tiah a chim. Cun, atulio dohthlennak kong ah zeirello in bia a chim caah kan tlaihmi a si,” tiah CDF-Mara nih thawngthanhnak ah an langhter.
“CDF-Mara nih tangka ting 30 MMK kan chuhmi hna hi Pu Nei Thlau he pehtlaihnak a ngei lo. SAC nih Non-CDM minung 25 caah an kuatmi hna tangka ting 60 MMK chung in kan lakpiakmi hna a si,” tiah an langhter chap.
CDF-Mara nih an tlaihmi Pu Nei Thlau hi an thlah cang. Asinain, Pu Nei Thlau he naihniam khuami hna nih an langhtermi hmanthlak le video ah cun Pu Nei Thlau a taitang, a keng le a mit hi tukvelhnak ah an duk dih.
Hi kong he pehtlai hin CDF-Mara nih, “Pu Nei Thlau ningcang loin a hremtu CDF-Mara ralkap (pawl) dantatnak kan tuah cang hna,” tiah cathanh ah an ttial.
