Ramleng Bawmhnak Hmu lo Chin Ralzam Khuasak Har

Mizoram ah Chin ralzaam 30,000 leng an phan tiah naite ah Mizoram ralzaam lei ttuanvo ngeitu hna nih thawngpang an rak chuah.

Chin ralzaam 30,000 lak ah Matupi le Paletwa ralzam 160 hrawng an umnak Lawngtlai District chung “Trade Center Camp” tiah an timi ah The Chin Journal nih vehvatnak kan vung ngei i, thil sining kan hmuhmi cu Laimi careltu hna theih ve awk ah kan rak langhter.

Ahmasabik ah hi Trade Center Camp ah a ummi Chin ralzaam pawl hi ramdang bawmhnak (International Aid) pakhat hmanh an hmu lo.

Ralzaam camp ah a ummi vemi CDM sayama nute nih, “Ramdang bawmhnak cu pakhat hmanh kan hmu lo. Ramdang a ummi Chinmi bu pakhat sin in naite ah khan voi khat cu a kan bawmh,” tiah a chim.

Ramdang bawmhnak (International Aid) kan ti tikah ramdang Chinmi bu hna bawmhnak si loin ralzaam a bawm tawntu ramdang NOG pawl (tck. WFP, UNDP, UNICEF, tbk) hi kan ti duhmi a si.

“Nitin ei awk facang cu anmah Mizoram mi nih a kan pek tawn. Asinain, mehmoi ca tu ah cun kanmah tein i zalh a hau ve. Ralzaam chungkhar ah pa a ngeimi hna cu khuachung ah kuli an ttuan pah tawn. Asinain, pa a ngei lomi hna le rianttuan awk a ngei lomi hna caah cun khuasak hi a har tuk hringhran,” tiah a cunglei CDM sayama nih a chim chap.

Ralzaam camp a si bang in Electric a um lo pin ah nitin hman awk dinti zong a har.

“Electric tu cu kan ngei lo. Asinian, phone battery rawnnak ah nikhat ah meiseh (Generator) hi suimilam pakhat chung hrawng a kan onpiak. Cun, Solar a hmang khomi nih an hman ve. Dinti hi a har. Atu zong hi tii a rawk i micheu rawlchuan loin a ummi zong an um lai,” tiah a chim chap.

Atutan The Chin Journal nih Mizoram kan Chin ralzaam kan vehvat hna hi a voi khatnak a si. Abikin kan i tinhmi cu “Chin ralzaam ngakchia hna fimcawnnak le an hmailei,” “Chin ralzaam nutung pawl an harsatnak,” le “Chin ralzam pawl Mizoram ah pawcawm kawlhawlnak zeitindah an tuah,” timi tuanbia tawi pawl tuah hi an si.

Aralaimi zarh chung ah a cunglei tlangtar kan tuahmi pawl hi The Chin Journal Facebook ah Kawlca/Laica in le Twitter ah Mirangca in kan rak tar te hna lai.

Support The Chin Journal

The Chin Journal (TCJ) is a small but passionate local news agency with limited income. Over the years, TCJ has played a crucial role in being the voice of the Chin people. We have strived to bring attention to the stories of Chin ethnic minority in Myanmar. However, like many small businesses, we have faced our share of financial struggles. The COVID-19 pandemic and the Myanmar miliatry coup in 2021 have severely impacted our revenue streams, making it difficult for us to continue our vital work without your support. This is why we are seeking donations to keep our news agency operational and continue providing reliable information to our readers. Any amount you can spare will be immensely valuable to us. To donate, click "Donate" button below. It will redirect you to the Donation Page. Thank you for your generosity!