Russia Ralkap pawl Ukraine Khuapi pawngte an Phan

Russia ralkap pawl Ukraine khualipi Kyiv pawngte Obolon district chung ah an lut cang, tiah Ukraine runvennak vuanci zung nih thanwgthanhnak a tuah.

“Obolon district ah Russia ralkap an lut cang. Mipi leng ah chuak hlah u, innte ah i erh u. Datsi rawnmi thawl i tuah cio u law kan ram a kan luh hnawhtu Russia ralkap pawl kham hna u,” tiah Ukraine runvennak zung nih mipi forhfialnak a tuah.

UK runvennak lei Secretary Ben Wallace nih “A ni khatnak ah Russia ralkap 450 hrawng an thi,” tiah a chim.

Ukraine President Volodymyr Zelenskyy nih Russia he biaruah a duhnak a langhter ko nain “Ukraine nih ralhriam a chiah hnu lawng ah bia kan i ruah lai,” tiah Russia nih a leh.

Nihin February 25 zaanlei tiang Ukraine rammi le ralkap fonh in minung 137 an thi, tiah Ukraine ngandamnak vuanci zung nih thanwgpang a chuah.

Local People. Local Stories.

© 2022 The Chin Journal. All Rights Reserved.

Pyidawtha, Hakha, Chin State

Contact: tcj@chinjournal.org