Mandalay khua, Falam Baptist Church (FBC) ah Pathian rian a tuan liomi Rev. Thian Lian Sang cu SAC ralhrang nih December 7 ah rianhrang he thonginn kum 20 leng an thlak, tiah thawngpang kan theih.
SAC ralhrang nih saya Thian hi nikum September 2021 ah Mandalay an inn ah an rak tlaih i, tukum June thla ah pohma 505 (a) in thonginn kum 3 an thlak hnu ah atu thla December 7 ah ralhrang dohkalhnak pohma 49 (a) in rianhrang he thonginn kum 20 an thlak chap hi a si. Azapi in thong dan kum 23 an pek.
Nikum September 2021 ah khan misawhsawh thilthuam aa hrukmi SAC ralhrang pawl cu saya Thian te inn ah an rak ra i biahal awk kan in ngei an ti hnu ah an kalpi.
Saya Thian an tlaih lio ah an chungkhar tangka ting 40 zong SAC ralhrang nih an lakpiak chap hna.
Saya Thian hi ramkhel buaibainak le pau dohthlennak he zong pehtlaihnak a ngei lomi a si, tiah chungkhar nih an chim. Biaknak riantuan a si bang in Chinram ah harsatnak a tongmi le misifak pawl bawmhnak a pe tawntu a si tiah an ti.
Saya Thian cu Mandalay Ubo thonginn ah an chiah i nizaan ah khan chungkhar he chikhat tonnak nawl an pek hna. Ngandam in a um ko, tiah chungkhar nih an chim.
