Hliampu SAC Ralhrang 15 Hrawng Hakha Sizung ah an Phan

Falam lei in nihin July 17 zaanlei ah Hakha khua ah a rak lutmi SAC ralhrang lak ah minung 15 hrawng Hakha sizung ah an phan, tiah thawngpang kan theih.

Nihin zaalei sml. 4:15 hrawng ah SAC ralhrang pawl cu motor 18 in Hakha khua ah an rak lut i hliamhma a pumi pawl cu Hakha sizung ah an kalpi hna. Hliam a pumi ralkap 15 lak ah hin kumtlinglo ngakchia ralkap zong an i tel.

Hakha ah a rak phanmi SAC ralhrang motor hi 17 a timi zong an um i 18 a si, a titu zong an um. Khuachung an rak luh lio ah bomb puahnak voi khat a chuak. Hliamhma a pumi an um lo.

Falam lei in an rak ratnak lampi ah SAC ralhrang pawl nih Taal khua le Chuncung khua inn 35 leng cu July 9, 14 le 15 ah an khangh hna.

Lampi ah CJDC chungtel CNA, CNDF, CDF-Hakha, CDF-Matupi le CDF-Thantlang nih voi tampi an kah hna i SAC ralhrang hi tlawm bik 30 cu an thi lai tiah an zumh.

Chin miphun ralkap lei in CDF-Matupi le CDF-Hakha in ralkap 2 an nunnak a liam i, a dang ralkap 10 hrawng an i hliam, tiah thawngpang kan theih.

Local People. Local Stories.

© 2022 The Chin Journal. All Rights Reserved.

Pyidawtha, Hakha, Chin State

Contact: tcj@chinjournal.org