SAC ralhrang nih Myanmar ram uknak an chuh thawk in SAC ralhrang lei ah a ṭang taktakmi zung rianṭuan nu Ma Sein Muh cu November 25 ah SAC ralhrang nih an inn ṭheng in an norpiak ve caah online ah a lungfahnak a hun ṭial.
Hi nu hi Yangon ramṭhen chung ah a ummi a si i, online in SAC ralhrang a do taktakmi Pancelo inn SAC ralhrang nih a chuh lio zong ah khan lunglawmhnak vantawng in Facebook ah a ṭialtu a si.
CMD kong ah hitinhin ca a rak ṭial bal: “CDM a tuah lomi Non-CDM ka simi kaa uanthlar tuk. A dang Non-CDM pawl zong upatnak nganpi kan pek hna” tiah a rak ṭial.
Asinain, SAC ralhrang nih an inn ṭheng in an hrawhpiak hnu ah cun hitihin a ṭial ṭhan: “Ralkap dirkamhtu kan si nain kan inn cu ṭheng in a kan hrawhpiak. Atu hnu ah cun ralkap he cun…” tiah a ti i a pehthai ti lo. Ralkap he cun hlat tak in ka um cang lai ti duh sehlaw a dawh.
Atulio Yangon ramṭhen le Mandalay ramṭhen chung ah SAC ralhrang nih phungninglo innhmun an timi pawl pehzul in an chuh thluahmah hna.
I ṭhial ding in an chimh hna i ni khat ni hnih a rauh hnu ah ṭheng pawl in an inn an hrawhpiak dih colh hna caah innlo ngei loin khuasa an tampi.
Ralkap dirkamhtu le Non-CDM a simi Ma Sein Muh te inn zong atu bantuk in hrawhpiak an ton ve hi a si.
