SAC ralhrang pawl nih sualnak ngei lo Myanmar rammi hna fak tuk in serhsatnak an tuahmi a hmuh tik ah a lung a fah tuk caah Kyaw Win Maung cu CDF-Kanpetlet sin ah aa fonh.
Kyaw Win Maung nih Chin ramkulh chung kahdohnak a fah cingling 2021 ah khan Kanpetlet ah CDF pawl do ding in SAC ralhrang nih an thlah vemi a si.
Asinain, SAC ralhrang nih mipi an tuahto ning, mipi an serhsat hna ningcang pawl kha a mit in a hmuh lawng si loin namnehnak in a khatmi SAC ralhrang bu chung um hrimhrim kha a duh ti lo caah CDF sin ah a zaamnak hi a si.
“Ralkap (sit-ṭat) nih mipi cung ah an tuahmi serhsatnak hi ka cohlang kho hrimhrim lo. Cu pin ah kanmah ralkap karlak ah i namnehnak le zeirellonak a tam tuk. Zalong tein um ka duh. Hi ralkap ah hin tel ka duh ti lo. Cucahcun CDM ka tuahnak a si,” tiah biaruahnak ah a chim.
Kyaw Win Maung cu November 13, 2022 ah khan CDF-Kanpetlet sin ah meithal zun khat he a rak zaam. CDF-Kanpetlet nih lunglawm tein an cohlan i himnak hmun ah an kuat cang, tiah theih a si.
