SAC Ralhrang nih Taal a Khua Ning piin an Khangh

Falam in Hakha lei ah a rak rami SAC ralhrang nih nihin July 9, zinglei sml. 11:00 hrawng in Taal khua cu a khua ning in mei in an khangh, tiah khua upa sin in thawngpang kan theih.

Khuami an zaam dih cang hna i an khua a kanghmi cu a lang in an cuan hna.

Taal khua upa pakhat nih, “Atu hi a kaang cuahmah ko. Inn 3 hrawng lawng a taang cang. Kan khua ning piin an khangh ko. Khuami cu kan zaam dih cang i a lang in kan khua a kanghmi kan cuan,” tiah The Chin Journal ah a chim.

Taal khua hi inn 40 hrawng a ummi khua a si i, kan hnu October 2021 ah khan SAC ralhrang nih inn 11 an rak duah cang.

Inn 30 hrawng a tang i nihin ah SAC ralhrang nih an duah tthan caah azapi ngawt in a kaang cang, tiah a cunglei Taal khuami nih a chim.

Falam in a rak kaimi SAC ralhrang pawl cu CNA hruainak in nizaan July 8 ah Thlanrawn khuapawng ah voi 3 an kah hna i ralhrang minung 20 hrawng an thi, tiah thawngpang kan theih.

Local People. Local Stories.

© 2022 The Chin Journal. All Rights Reserved.

Pyidawtha, Hakha, Chin State

Contact: tcj@chinjournal.org