Nizaan December 15 ah Tedim peng uknak lei bu nih an tarmi Rih-Kalay karlak lamphih ding timi cathanh cu CNF nih a theihpi lomi, phungning lo cathanh a si, tiah CNF chimnak nawlngei Salai Htet Ni nih The Mindat Post ah a chim.
Cu cathanh cu Tedim peng uknak lei bu nih an tar hnu ah PDF-Zoland hiramtlai bu le The Tedim Times thawngzamhnak nih an i tar chin ve i, mizapi nih hmuh cio a si.
Hi cathanh kong he pehtlai hin Tedim peng Zimte Camp ah rian a ṭuan liomi CNA ralkap upa lei zong nih kan thei lo tiah an chim.
Cu cathanh cu December 17 ah chuah ding phun in nithla an khenh i, December 18 in January 5 tiang Kalay le Rih lampi kan khar chung lai, tiah an ṭial.
Salai Htet Ni nih, “Lam kan khar lo. A deu ti nakin phungning lo/kan theihpi lomi a si kan ti lai. Center in zeihmanh nawl kan pekmi hna a um lo,” tiah a chim.
Tedim peng uknak lei bu nih, “Kanmah theipinak zeihmanh um loin zei bantuk hriamtlai hmanh kan hmunram ah nan cawlcang lai lo. Mipi caah harnak a chuak ding a um ahcun thawng kan in thanh ko hna lai,” tiah nizaan ah an ṭial.
