SAC nih Myanmar ram uknak an chuh hlan ah Yangon ramṭhen chung ah sianghleirun a kaimi siangngakchia pasarih cu SAC nih November 30 ah thihdan a pek hna, tiah theih a si.
Thihdan pekmi siangngakchia pasarih cu: Thura Maung Maung, Khanh Zin Win, Zaw Lin Naing, Thiha Htet Zaw, Hein Htet, That Paing Oo le Khant Lin Maung Maung hna hi an si. Zan zapi in Dagon University ah sianghleirun a rak kaimi an si hna.
April 18, 2022 ah khan South Dagon ah a ummi Global Treasure Bank (GTB) manager U Saw Moe Win (ralbawi ṭhing, kum 48) cu GTB bank hmai a motor cung in a ṭum lio ah meithal in kah a tong i, sizung an phanhpi hnu ah a thi.
April 19 ah Yangon Liberation Force (YLF) timi Yangon khuapi chung kahdohnak a tuahtu bu nih, “Ralbawi ṭhing Saw Moe Win kan kah,” tiah thawng an thanh.
April 21 thawk in a cunglei siangngakchia pasarih hi an pehtlai kho ti hna lo i, South Dagon palik zung ah chungkhar nih an hlathlai tik ah an tlaih hna timi thawngpang an theih.
Hi siangngakchia pasarih hi ralkap ṭhing GTB bank manager U Saw Moe Win a thattu an si, U Saw Moe Win thahnak ah an i citmi motor kan tlaih, tiah SAC nih thawngpang an chuah.
Insein thonginn chung biaceih zung ah ralhrang dohkalhnak upadi pohma 51 (c) le mithah lainawnnak pohma 302 (1) (a)/34 in taza an cuai hna i, November thlathih ah thihdan an pek hna hi a si.
Siangngakchia pasarih thihdan an pek hna lio ah hin ramkhel thongtla a dang minung 11 zong thihdan an pekmi an um, tiah Mizzima nih a ṭial.
Kan hnu July 2022 ah khan SAC nih ramkhel thongtla U Phyo Zayar Thaw, Ko Jimmy, Ko Hlah Myo Aung le Ko Aung Thura Zaw cu hriawhnak in a rak thah hna caah atutan siangngakchia pasarih zong hi thihdan taktak an pek sual hna lai timi an phang ngaingai.
SAC nih anmah dohkalhtu pawl tihphanter ding in thihdan hi ralhriam bantuk in timh ciammam tein a hman, tiah vawleicung nuhrin covo bu hna nih sualphawtnak an tuah ve.
