SAC ralhrang ralchanh in Myanmar ram democracy caah a cawlcangmi hna le Myanmar mino vialte sin ah thonginn ah a ummi Daw Aung San Suh Kyi nih conglawmhnak bia a chim.
Cu conglawmhnak bia cu naite ah Insein thonginn in a luatmi Australia rammi Sean Turnell sin ah Suh Kyi nih a cah tami a si.
December 6 ah News 10 thawngzamhnak nih Sean Turnell cu tonbiaruahnak an ngeih i, Sean Turnell nih Suh Kyi biacah cu zapi theih in a hun chimphuan.
“Aluancia zarh 8 ah khan Daw Suh he kan i tong. Myanmar ramchung thil sining dikhmaan hi mizapi theih ding in chimphuan awkah Daw Suh nih a ka cah. ‘Kannih cu kan kaa a kan phih, nang nih cun kan sining na aupi khawh lai’ tiin Daw Suh nih a ka chimh,” tiah Sean Turnell nih a chim.
Atulio Myanmar ramchung hriamtlaih dohthlennak kong he pehtlai in Suh Kyi nih zeitindah a ruah timi kong an hal tik ah Sean Turnell nih hitihin a leh:
“Atulio Myanmar ramchung dohthlennak kong ah Daw Suh hi a lunghmui ngaingai. Abiapi in Myanmar mino hna cung ah aa lawm i a uanthlarpi tuk hna. Myanmar mipi nih Democracy theipar hi caan tawite lawng an tem manh nain Democracy caah zeitluk in dah timhtuahnak an ngeih timi a theih tik ah aa lunghmuih khun,” tiah a chim.
Myanmar ramchung PDF ralkap pawl zong nih Suh Kyi biacah an theih tik ah an lunglawhnak le thazaang thar an hmuhnak pawl an langhter hna.
“Hi dohthlennak ah hin achelcaan ah cun lungder in kan um ko nain atu bantuk in Daw Suh biacah kan theih tik ah kan thazaang um tuk ṭhan,” tiah Yinmapyin PDF ralkap pakhat nih Irrawaddy ah a chim.
Dawei PDF ralkap pakhat zong nih, “Mino pawl nih ralhriam tlaih in SAC ralhrang kan rak dohka te khan Daw Suh nih atu bantuk in a chim lai timi hi ka theih cia ko,” tiah a chim ve.
