Tamu-PDF Battalion-4 nih dalan nu an thah lio minute 3 fai video cu December 3 hrawng ah online ah a hun kai tik ah atulio pau dohthlennak a dirkamhtu Myanmar mipi zong an lau hna i, hmailei dohthlennak caah abiapimi PDF pawl dirhmun zong a chiatchuah sual lai timi thinphannak a um ngaingai.
Atu bantuk in Tamu-PDF nih zapi hmuhnak motor lampi cung ah dalan nu an thahnak hi aruanga um, tiah PDF ralkap bu dang pawl nih Mizzima sin ah an chim.
Thah a tongmi dalan nu hi Non-CDM sianginn sayama a si tiah SAC ralhrang a dirkamhtu thawngzamhnak pawl nih an ti nain ataktak ah sianginn cachimtu a rak si lo.
Tamu khua, Sawbwa sang no. 12 ah a ummi kum 24 nungak Ma Aye Mar Tun tiah an auhmi a si i, Tamu Pyosawhti hruaitu U Chian Meh timi pa i a tunu a si.
Ma Aye Mar Tun an thahnak video hi aluancia June 2022 ah an rak thlakmi a si. Cu hlan May 2022 ah hin Ma Aye Mar Tun le Tamu-PDF karlak ah chimphoih khawh lomi buaibainak fak ngaingai a rak um.
PDF ralkap pakhat nih, “Tamu-PDF ralkap Hein Wana Aung hi meithal cawk ding in tangka ting 80 he Tamu khua ah a rak lut. Cu lio ah cun mah dalan nu Ma Aye Mar Tun nih hin meithal puaisa bantuk in aa umter i Hein Wana Aung cu SAC ralhrang a rak tlaihter hna. A tangka an lak pin ah ruru hranghrang in an thah,” tiah a chim.
Hein Wana Aung timi Tamu-PDF ralkap pate hi kum 17 lawng a si rihmi minote a si. Nawlngai le minunnem a si caah a hawile ralkap dang pawl zong nih an tlaihchan ngaingaimi a si.
Hein Wana Aung cu puaisa aa ṭuantermi Ma Aye Mar Tun nih a leirawi hnu ah SAC ralhrang le Pyosawhti pawl nih fak piin an hrem hnu ah a hnakhaw tiang an tan i an rak thah. A ruak an vui lio ah a hawile Tamu-PDF ralkap pawl an rak ṭap dih hna. Lungfahnak in an rak khat.
Hein Wana Aung thah a ton hnu thla hnih a rauh ah leirawltu dalan Ma Aye Mar Tun hi Tamu-PDF Battalion-4 nih an tlaih khawh i lungfak tuk in lehrul chamnak ah ruru hranghrang in an thah hi a si.
Dalan Ma Aye Mar Tun an thahnak video hi SAC ralhrang le Pyosawhti pawl nih tu kum October le November thla chung i Tamu-PDF sakhaan an rak luh hnawh lio ah computer an lakmi chung ah a ummi a si, tiah anmah Tamu-PDF nih Mizzima sin ah an chim.
SAC ralhrang nih dalan Ma Aye Mar Tun thah a tonnak video cu online ah an hun zamh tik ah “Sualnak ngei lo Non-CDM sianginn cachimtu a si,” tiah a tuanbia fahter khun ding in ningcang loin an ṭial.
