Thantlang khuachung ah kum upa bik a simi Thantlang Baptist Church (TBC) biakinn cu nihin ah a kaang, tiah TBC vice-president Pu Lawm Bik nih The Chin Journal ah a chim.
Pu Lawm Bik nih, “Nihin zaanlei sml. 5:30 hrawng ah khan a hmun ah a ummi minung pahnih nih thawng an vun ka thanh. A kaang timi cu a fiang ko. Thlualam le Congthia lei zong in a kanghmi an hmuh,” tiah a chim.
Thantlang ah bochanmi khua upa pakhat nih, “TBC biakinn a kaang timi fehter khawh a si ko. Nihin zaanlei sml. 4:30 hrawng ah a kaang,” tiah a chim.
“TBC khrihfabu hi kum 60 hrawng kan si cang. Chungtel inndawng 600 hrawng kan um,” tiah Pu Lawm Bik nih a chim chap.
September 2021 thawk in Thantlang khuachung ah Biakinn 11 le inn inn 1,200 leng SAC ralhrang nih an khangh cang.
