Thantlang peng Public Administration le CDF-Thantlang humhakmi hmunram ah a ummi khuabawi hna tonnak an ngei, tiah Public Administration, Thantlang nih thawngpang an chuah.
Tonnak cu November 29 in 30 tiang an tuah i, 2022-2023 ah khuabawi ṭuan ding in thimtharmi he tonbiaruahnak an ngei hna.
“Zatlanguknak ah hin fimcawnnak, lam le sul, biacaihnak, police, ngandamnak lei le khuabawi hna hi biapi in kalpi an si,” tiah Public Administration, Thantlang nih an langhter.
“Khuabawi pawl hi kum 1 ah term 1 tuan dingin mahle khuami cio i mipi hna nih lungtling tein thim an si bantukin 2022-2023 chung khuabawi tuan ding zong khuami cio nih thim than an si. Thim tharmi khuabawi hna he i tonpumhnak cu 29-30 November 2022 ni ah tlamtling tein kan tuah khawh,” tiah an langhter chap.
Public Administration, Thantlang nikum November 27-28, 2021 ah CDF-Thantlang nih a humhakmi khuate 51 ah rak thokmi a si i, atu ah cun kum khat an hun tling cang.
