Nizaan December 24 zaan ah Thantlang ah hram a khuarmi SAC ralhrang bu in ralkap pahnih cu meithal he CDF le CNA ralkap pawl sin ah an zaam, tiah thawng kan theih.
“Nizaan zaanṭim ah khan an zaam hi a si. Thantlang khua i CDF le CNA ralkap pawl an umnak hmun ah an vung zaam. Meithal 2 le kuan pawl an i ken,” tiah minung pakhat nih a chim.
Meithal he a rung zaammi SAC ralkap pahnih cu CDF le CNA ralkap pawl nih lumsa tein an don hna i, himnak hmun lei ah cu zaan ah cun an kuat colh hna.
Thantlang le Hakha karlak ah kanhnu November thla chung ah kahdohnak a fak ngaingai. SAC ralhrang nih Helicopter le Vanlawng tiang hmang in miphun ralkap pawl an kah hna.
Asinain, atu December thla chung ah cun kahdohnak a hun dai ngai rih. SAC ralhrang pawl hi Timit tiang lawng an phan kho. Thantlang SAC ralhrang han sin ah zei bantuk bawmhnak hmanh tlanglam in an luhter kho, tiah thawngpang kan theih.
