Thlahlawh tampi a eimi vawleicung minthang bikbik bawlungchuihtu pawl caah cun World Cup ah an co dingmi laksawng tangka hi siaherh tuk awk a um lem lai lo.
Laksawng tangka hmuh ding nakin mahle ram limhaang cawisanternak ca deuh ah biatak tein an i zuam hi a si deuh.
Atutan 2022 World Cup ah Champion a simi Team nih laksawng tangka zeizah dah an hmuh lai timi kong he pehtlai in NBC thawngzamhnak nih a langhter.
World Cup ah aa tel khomi vawleicung ram aiawhtu Team 32 caah laksawng $440 million hi ṭhenphawt ding in FIFA nih budget a chiahmi a si.
Team 32 zuamnak ah dotla a simi (a qualified mi) Team pawl cu Team khat ah $1.5 million hi an pek colh hna. An Qualify man an pekmi hna a si.
Cu pin ah Group Stage, Knock Out Stage, Quarterfinals, Semifinals le Final tiin a dotdot in an kai tik ah anmah le an phaknak dot ning cio in tangka laksawng pek chap an si, tiah NBC nih a langhter.
Russia ah an rak tuahmi 2018 World Cup ah khan Champion a simi France cu pakhatnak si man laksawng $38 million hi a dang tein an rak pek chap.
Asinain, atu kum ah pakhatnak laksawng hi an karh deuh. Atu kum pakhatnak a hmumi nih laksawng $42 million an co lai.
Bawlungchuihtu pawl laksawng an ṭhenphawt hna ning belte hi mahle ram cio tlangtlaknak in a kal. Abiana ah, World Cup bawlungpuai ah a chuih a tlawmmi cu tlawm deuh zong in an pek tawn hna. Mahle ram Bawlung lei bu zulhphung ning in i pek cio a si.
Atu kum World Cup Group Stage tiang ah a phanmi Qatar, Ecuador, Wales, Iran, Mexico, Saudi Arabia, Denmark, Tunisia, Canada, Belgium, Germany, Costa Rica, Serbia, Cameroon, Ghana le Uruguay hi Team khat ah $9 million cio an pek hna.
Cun, Round 16 (Knock Out) ah a phanmi USA, Senegal, Australia, Poland, Spain, Japan, Switzerland le South Korea hi $16 million cio an pek hna.
Quarterfinals tiang a phan khomi Brazil, Netherlands, Portugal le England hi $17 million cio an pek hna. Semifinals in a tlami ram 2 an um (Croatia le Morocco). Pathumnak an i cuh rih lai. Pathumnak a hmumi nih $27 million an co lai i, Palinak a hmumi nih $25 million an tin ve lai.
Cun Argentina le France hi Champion an i cuh lai i, teitu Champion nih $42 million an tinco lai. A sungmi, pahnihnak a hmumi nih $30 million an co ve lai, tiah NBC nih a langhter.
Hi laksawng tangka pawl hi FIFA nih World Cup puaipi a tuahnak in a hmuhmi tangka chung in an pekmi hna laksawng an si.
