Ukraine kong he pehtlai in Philippines nih US bawmh ding in ready kan si, tiah Philippines President Duterte nih a chim, tiah USA Today nih a ttial.
Philippines cozah meeting ah Ukraine kong he pehtlai in ceihmainak a um i, President Duterte nih US bawmh ding in a chimmi bia cu Washington ah a ummi Philippines Ambassador Jose Manuel Romualdez nih a tanglei bang in a chim chin.
“Naite Philippines cozah meeting ah President Duterte nih US ca ah kan ram kutka on ding in ready kan si tiah a chim. Ukraine kong he pehtlai in thil sining chiat lei a panh chinchin ahcun 1951 lio i US-Philippines karlak hnatlaknak ning in Philippines nih US ralkap pawl ca ah kan ram kutka kan on ko lai,” tiah Ambassador Jose Manuel Romualdez nih a chim.
Russia nih Ukraine a luh hnawhnak zarh 2 leng a si cang i, Ukraine rammi 450 hrawng an nunnak a liam cang.
Russia bomb kahmi ruang ah nitin in sualnak ngei lo Ukraine rammi an nunnak a liam i, hliamhma a pumi zong March 9 tiang ah minung 800 leng an si.
Ukraine ramchung rilikam khuapi a simi Kherson khua cu Russia kut cung ah a tla cang.
Asinain, khualipi Kyiv telh in a dang khuapi pawl Russia ralkap nih an la kho lo. Kahdohnak pehzul in a um. Ukraine rammi ting 20 hrawng ralzaam dirhmun in an um cang.
