Nihin (Kawlram caan) November 30 zinglei sml. 1:30 ah US le Iran an chuih bang in England le Wales zong cu caan ah cun an i cil ve.
US le Iran puai zoh tik ah Half Time hlan kha cu bawlung tinco (possession) lei ah US nih 70% bak in Iran an hruai hna. An ti khawh ngaingai hna.
An chuih caan minute 38 a hun si ah khin US lei laikal (Attacking Midfielder) a simi Christian Pulisic nih Iran cu goal khat a sut hna. Half Time hnu ah Iran nih cham khawh ding in biatak thlak in an i zuam nain caan nih a nguh ti hna lo. US nih an tei thai hna.
England le Wales an chuihmi zoh tik ah Wale hi zohchia deuh ngaiin an sung. Half Time hnu ah England nih goal 3 khengte an sut hna i cham khawh awk hrimhrim a ṭha ti lo.
Group B ah England hi mark 7 a hmu i, US hi mark 5 a si. Iran mark 3 le Wales mark 1 tiin an si ve. Cucaah, Iran le Wales cu puantom zual in an ram lei ah an tlung cang lai.
US le England belte cu Team 16 i zuamnak “Knock Out Round” ah an vun kai kho cang. Atu tiang ah Knock Out Round ah a kai khomi ram hna cu: France, Portugal, Brazil, Netherland, Senegal, England le US hi an si hna. A tla cangmi ram hna cu: Qatar, Canada, Ecuador, Iran le Wales hi an si.
