US Air Force nih a ngeih tharmi nuclear bomb thlatu B-21 Raider vanlawngpi hmuhsaknak cu tutan zarh cacawn ninga ni ah US runvennak zung Pentagon nih a tuah, tiah Associated Press (AP) thawngzamhnak nih a ṭial.
Aluancia kum 30 thawk hrawng in US ralkap nih bomb thlatu vanlawng a thar ngaingai hi an rak serchuah ti lo. Atutan hi a thar khitkhette an serchuah ṭhanmi a si.
American vanlawng sertu company Northrop Grumman nih a serchuahmi a si i, nuclear bomb a phorh khawh pin ah Radar nih a tlaih khawh lo caah “A tlau khomi bomb thlatu vanlawng” (Stealth bomber) ti zong in an auh.
“Hmailei Tuluk le US karlak ral lei entainak a um sual ah tiin US nih timhcia tein ralhriam lei thazaang a chapnak phun khat a si,” tiah AP nih a langhter.
US Airforce nih ahlanpi in an rak hman zungzalmi vanlawng bomb thlatu B-52 Stratofortress, B-1 Lancer le B-2 Spirit tibantuk an ngei ko nain atutan vanlawng hi cu hawidang he aa lo lo, phundang a si, tiah US Defense Secretary Lloyd Austin nih a chim.
“Hi vanlawng hi cu phundangte a si. Kan dawtmi kan ram kan kilven hrimhrim lai timi lungput in kan serchuahmi a si,” tiah a chim.
US ralkap nih nuclear ralhriam kah khawh nakding ah ningcang phun 3 a hman: A pakhatnak ah vawleitang in kahmi (Silo-Nuclear); a pahnihnak ah tichung in kahmi (Sibmarine); a pathumnak Van in kahmi tiin an si.
Atutan B-21 Raider hi Van in nuclear ralhriam kah khawhnak lei caah thazaang thar nganpi an hun chapmi a si.
US Airforce Secretary Deborah Lee James nih, “Tuluk le Russia tlerhkhawnnak kan dironh khawh nakhnga hi bantuk bomb thlatu vanlawng thar hi kan herh,” tiah a chim ve.
B-21 Raider vanlawng hi pakaht ah a man zeizah a si timi Pentagon nih a phuang lo. 2010 ah khan B-21 Raider pakhat ah $550 million hrawng a dih lai tiah an rak ruahdamh. Atu 2022 rate in tuak ahcun $753 million hrawng a si cang lai tiah an zumh.
Atu ah US Airforce nih B-21 Raider vanlawng thar 6 an ngeih i, hmailei ah 100 tiang in ngeih khawh ding in timhtuahnak an ngei, tiah AP thawngzamhnak nih a ṭial.
