Nihin March 8 (Kawlram caan) ah US nih Russia ram cung ah dantatnak fak ngaingai a thar in a tuahmi thawngthanhnak a tuah cang.
Russia ram in US ramchung ah “Zinan” le “Gas” kuat kham dih a si cang, tiah US President Joe Biden nih thawng a thanh.
“Russia zinan le gas pawl US ramchung ah luhter lo ding in nihin thawk in kan kham dih cang. US rammi hna zong Putin ruang ah zeimawzat kan temtuar ve lai tinak a si,” tiah President Biden nih reporter pawl sin ah a chim.
Russia zinan le gas hi Europe vawleitthen chung ram hna le China le Belarus nih tam bik an cawk.
US ramchung i thla khat chung an hmanmi zinan le gas vialte lak ah zatuak 8% hi Russia in a rak lutmi a si, tiah Reuters nih a ttial.
Cucaah, US nih atu bantuk in Russia dantatnak a tuah tik ah US ramchung zong ah zinan le gas man a kai ve lai.
Russia nih Ukraine ram a luh hnawh thawk in US nih Russia cung ah sipuazi lei dantatnak dangdang zong a rak tuah cang hna.
