US tiang phan lak in kah khawhmi Rocket Missile (ICBM) tlamtling tein kan hneksak khawh cang, tiah North Korea cozah thawngzamhnak Rodong Sinmun nih November 27 ah a langhter.
“ICBM missile tlamtling tein hneksaknak an tuah khawhmi cung ah North Korea hruaitu luzik Kum Jong-un nih lunglawmhnak a chim. Hi missile kahnak hmun hi vawleitang ah chiahmi a si caah fawilebai in ral nih a hmun an theih kho lai lo,” tiah Rodong Sinmun thawngzamhtu nih a chim.
North Korea nih hin ahlan ah lamnai kah khawhmi missile (Short-range ballistic missile) cu tlamtling tein a rak serchuah khawh cang tiah an zumh.
Atutan an hneksakmi hi anmah North Korea thawngzamhnak nih cun vawleitthen (Continent) pakhat le pakhat karlak phan i a kap khomi ICBM a si tiah a chim. Cu missile cu Hwasong 17 tiah min an pek.
“Hi Hwasong 14 missile nih hin US ramchung khua paohpaoh phan lak in a kah khawh hna. Hi nak hin a ṭha deuhmi ralhraim pawl khulrang in kan ser cuahmah lai tiin hruaitu Kim Jong-un nih a chim,” tiah Rodong Sinmun nih a langhter.
