US ramcung zatuak in 60% ah khuasik thlichia (Winter Storm Elliott) cu cacawn nili in aa thawk in atu tiang ah a tlawm bik minung 9 an nunnak a liam cang, tiah CNN nih a langhter.
Hi khuasik thlichia hi US ramchung hmun tam u ah Christmas Ni (December 25) tiang a caam kho tiah an ruah caah Christmas program a letmi zong an um hna.
Thlichai nih a chuahpimi kik le hawhra ruang ah US ramchung khuapi pawl umkalnak le khualtlawnnak bus, tlanglawng le vanlawng tibantuk a tam u cu an cancel chung hna.
Buffalo, New York ah a ummi Mick Saunders nih cun, “Zarhpi Ni tiang thlichia a um lai tiah kan ruah. Cucaah, Christmas zong kan let ṭhan. Atu sining cun Christmas tuah lo hi a him bik ko,” tiah a chim.
Kansas ah khuasik thlichia ruang ah motor khawndennak a chuak i, minung 2 an nunnak a liam. Cun, a dang minung pakhat zong hawhra ruang ah an inn ah i khawndennak sualnak a chuak i a nunnak a liam.
Kentucky zong ah minung 3 an nunnak a liam. Thlichia ruang ah Motor pahnih i pahnak ruang ah an nunnak a liam hi a si.
Ohoi zong hi thlichia nih a chuahpimi motor khawndennak ruang ah minung 4 an nunnak a liam, tiah Govenor Mike DeWine nih CNN ah a chim.
Atutan US ramchung Khuasik thlichia hi aluancia kum 30 chung ah a zual bik le a kih bik caan a si. Wyoming le a dangdang khua tampi ah cun a kihlum hi 43F in 3F ah minung 30 chungte ah khulrang tuk in a ṭum.
Cun US Nitlaklei hmunhma pawl ah hin a kih ningcang a zual khun. A kihlum -35F tiang ah a tla. Nihin ni tiang ah US ramchung vanlawng 6,900 nih cacawn Nili ni le Ninga ni khualtlawn an let hna.
