November 23 ah an rak chuihmi atulio World Cup bawlungchuih zuamnak puai ah Japan nih Germany cu 2-1 in a tei tik ah vawleicung bawlung zatlangpi khuaruah har in an um.
Micheu nih cun a tei sual i a si ko lai ti zong in an ruah. November 27 ah Japan le Costa Rica an hun cil i Costa Rica nih 1-0 in a hun tei tik ah cun Japan nih Germany kha a tei sual i a si ko, Spain nih a tei chap lai i a tla lai tiah a zumtu an tam ngai.
Japan le Spain puai ah ahodah aa tei lai tiah ruahdamhnak an tuahmi zong ah Spain nih a tei lai tiah vote a petu an tam deuh ngaingai.
Sihmanhsehlaw, Samurai lungput a kengmi Japan Team nih Spain cu ruah lo tuk in 2-1 in December 1 ah a hun tei diam ko. Japan cu Group E ah mark sang bik a hmu i Round 16 ah a kai. Spain a sung nain Costa Rica a teitu Germany nakin goal 5 tam deuh a ngeih caah Round 16 ah a kai ve thotho.
Europe ah bawlungchuih thiamthiam an umnak minthang Germany le Spain cu Asia ram Japan nih a tei hna tik ah vawleicung bawlung zatlang a tlirh ko.
Germany le Spain ralchanh in goal 2 a suttu Japan bawlungchuih thiam Ritsu Doan nih, “Hihi tuanbia thar kan ṭial a si lo; vanpang bantuk in kan hmai ah aa khammi zuamcawhnak nganpi kha ṭanrualnak in kan tei tu a si,” tiah a chim.
Japan ralchanh in goal khat a suttu Spain bawlungchuih thiam Morata nih, “Kan kai kho i, cucu abiapmi a si ko. Hi hnu ah kan tlak a si le inn ah kan tlung ko lai. Asinain, aralaimi puai ah atutan Japan he puai bantuk kan si lo nakhnga fak piin kan i zuam lai,” tiah a chim ve.
Atu tiang ah World Cup “Knock Out Round” ah a kai khomi ram 14 an um cang.
