Argentina nih 2022 World Cup ah France cu Penalty in an tei hna i, kum 36 hnu ah Argentina nih a voi khatnak bik World Cup Champion hrai an hun thlir ṭhan.
Puai a dih hnu ah thawnglatu pawl nih Messi cu bia an hal tikah, “Pathian nih hi teinak laksawng hi a ka pek lai timi ka theih cia ko,” tiah a leh hna.
“Teinak kan hmuh ningcang hi ruah tik ah khuaruahhar a si. World Cup champion si hi ka rak duh tuk hringhran. Pathian nih a ka pek telai timi zong ka theih ko. Atutan World Cup ah hin a tling hrimhrim lai ti zong ka lungthin nih a theih. Cucaah, atu cu lawmh caan a si cang,” tiah Messi nih a chim.
“Hi hlan ah hin Argentina Team nih harnak le zuamcawhnak tampi kan tong. Kan ram Argentina phak lai zong kan i ngeih hringhran,” tiah a chim chap.
Hlanlio Argentina bawlungchuih minthang Rivaldo nih, “Messi, biachim ding hmanh ka thei lo e. Hi hlan ah hin vawleicung champion si ding in na rak i tlak tluk cang ko. Asinain, Pathian nih cun zeizongte a theih ko. Atutan Zarhpi Ni ah Pathian nih teinak luchinh an chinh ko lai…Pathian nih in umpi hram seh,” tiah Final an chuih hlan ah khan bia a rak cah ve.
2022 World Cup hlan ah World Cup champion si khawhnak kong he phehtlai in Messi cu bia an rak hal bal i, cu lio ah cun “Pathian nih caanṭha caanrem a ka tinhpiakmi a um tiin ka zuamh,” tiah a rak chim bal.
Atutan World Cup ah Argentina nih Champion an co hnu cun Messi nih vawleicung bawlung zatlang ah tlamtllinh awk vialte a tlamtlinh dih cang.
Cucaah, vawleicung bawlung chuih minthang hna, sport journlists hna le bawlungchuih lei a ngaithlaitu mi tampi nih “Messi hi vawleicung bawlungchuihnak tuanbia ah a lianngan bikmi (The Greatest of All Time) a si ko,” tiah an thangṭhat.