Yangon Lamkam Thilzuartu Unau Nu Pahnih Thah an Tong

Yangon khuachung ah michoklet an tam biknak hmun pakhat a simi Kamayut peng, Hledan ah nihin zinglei sml. 9:00 hrawng ah meithal kahnak a chuak i nu pahnih an nunnak a liam.

Meithal in kah a tongmi hna hi USDP party chungtel an si i, Hledan lamkam ah ei-din a zuarmi an si, tiah Myannmar Now nih a ttial.

Minung pakhat nih, “Mah hna pahnih hi unau an si. Lamkam ah ei-din zuar ding an timh cuahmah lio ah meithal in an rak kah hna. Pakhat hi a hmun ah a thi i, a dang pakhat hi sizung an kalpinak lampi ah a thi,” tiah Myanmar Now sin ah a chim.

SAC ralhrang a dirkamhtu hna nih Telegram Channel pawl ah cun PDF nih an thahmi hna a si, tiah an ruahnak in an langhter.

Asinain, ahote bu set nih dah atu bantuk in thahnawnnak a tuah timi faing in theih a si rih lo.

Myanmar ramchung hmun kip ah SAC ralhrang a dirkamhtu (Dalan/thawngpetu) pawl nitin thah an ton bang in SAC ralhrang a dirkamhtu “Twe-Toh” timi bu zong nih NLD chungtel pawl i sel in tlaihkhihnak le thahnawnnak an tuah ve.

Local People. Local Stories.

© 2022 The Chin Journal. All Rights Reserved.

Pyidawtha, Hakha, Chin State

Contact: tcj@chinjournal.org