January 21 ah khan Yangon ramtthen North Kokkalapa, Thanthumar lam ah a ummi Ngwetaung timi rawlawr riantuantu pawl nih PDF ralkap pakhat cu an tlaih hnu ah an thah, tiah Kawlram chung Media tampi nih an langhter.
Hi PDF ralkap hi “Freeland Attack Force” (FLA) chungtel a simi Ko Thar Din a si, tiah FLA nih fehternak zong an tuah.
January 21 ah Ko Thar Din le a hawi pakhat nih Ngwetaung rawldawr pawng ah a ummi sang uknak zung cu bomb in an cheh i an zaam.
Cuti an zaammi a hmutu Ngwetaung rawldawr riantuantu pawl nih tlaih ding in an dawi hna. Ko Thar Din nih thawngpang bomb (အသံဗုံး) a puah i a hawipa cu a zaam kho. Asinain, amah belte hi zaam kho loin rawldawr riantuantu pawl nih an tlaih.
January 22 ah SAC ralhrang a dirkamhtu Telegram Channel pawl nih Ko Thar Din a thihnak kong an thanh. FLA zong nih kan ralkap a si, tiah nihin ah theihternak an tuah ve.
Ko Thar Din a tlaitu pawl rian an tuannak Ngwetaung timi rawldawr hi SAC ralhrang bawi pakhat chungkhar nih an ngeihmi a si, tiah Kawl Media pawl nih an langhter.
Atu bantuk in Ko Thar Din tlaihkhih le thah a ton hnu ah Yangon khuachung ah a cawlcangmi Urban Guerilla (UG) PDF ralkap bu pawl nih lehrul chamnak kan tuah hrimhrim lai, tiah cathanh an chuah hna.
